شوفى قد إيه










يا بخت من يقدر يقول
واللى ف ضميره يطلعه


يـا بـخـت مـن يقدر يفضفض بالكلام
وكـل واحـد يسـمعه
يقف فى وسط الناس ويصرخ : آه يا ناس
ولا مـــــــلام
ييـجى الطبـيب يحكى له ع اللى بيوجعه
يـكـشـف مـكـان الجرح ويحط الدوا
ولـو انـكــــوى
يـقـدر يـنـــوح
وانـا اللـى مـلـيـان بـالـجــروح
مـا اقـدرش أقـول
ما اقـدرش ابـوح
والسـهم يسكن صدرى ما اقدرش انزعه
شـوفى قـد إيــه؟
احـنـا الـنـهـارده إيـه فى أيام السنه
شـتـا والا صيف
وفـيـن أنــــا
إيه اللى وصلنى هنا
أنـا صـاحـب البـيـت والا ضـيـف
صوتـى انـحـبس
مـا اقـدرش اقـول
مـا عـرفـش حـاجـه عـشان اقـول
مـا اعـرفـش غـيـرك انـتـى بس
يـا بـت يـاللـى فى حبك العقل اتهوس
مـكـان غـريـب
كـأنـه سـجـن كـأنـه مخدع لحبيب
كـأنــه بـيــر
شـبـاك حـديد وعليه ستاير من حرير
والريـح بـيـنـفـد منه زى المسامـير
الريــح عــوى
قلـبى انـقـبـض
قـلـبـى اتـلـوى
الشـمس تلج اصفر شعاعها صاروخ هوا
الـضـلـمـه تـلـج اسـود كـتـيـر
ألوف ألوف القناطير
خـبـيـنـى فـى شـعـورك يـا بت
أحـسـن عـروقــى اتـخـشـبـت
شعرك خـشن زى الحِرام الصوف يا بت
خبينى فيه م الزمهرير
ونَيِّميـنى فى السرير
دخـل النـبـى بـردان خديجـه لَفِّتـه
حَـطِّـت عـلـيـه غطيان لحد ما دفته
دخـل النـبـى بردان وقال: فيـن الغطا
البسمة غطت شفـته