الليلادى











الليلادى
كل أحبابى زارونى
طيف خيال كَحَّل عيونى
هام معاهم قلبى . سافر ودعاهم
محلا طعم السهد لما سهرونى
قلبى سافر ودعاهم .. م البوادى
من على روس الجبال .. من كل وادى
فى بلادى
اللى منها الشمس جايه
البلاد العربيه



الليلادى
زارنى فارس م الجزاير
طيف على جبينه قريت كلمة بطل
السلاح فى إيديه وفى عينيه الأمل
والشباب من قلبه فاير
قبل ما يرد السلام قال ح انتصر
انت منصور والسلام راح ينتشر
وح نبنى له مناير
والهنا ح يقول أنا جاى ف ميعادى
ليله تشبه لليلادى
فى بلادك وبلادى
اللى منها الشمس جايه
البلاد العربيه



الليلادى
زارنى من شعب العراق
طيف جميل .. علمنى إيه هو الفدا
بنت عم الشهداء
ماشيه فى الموكب بتهتف للحقيقة
جرحها وسامها .. وفى دموعها البريئة
كل دم الأبرياء
زارنى طيفها وابتسم لى بضحكة مرة
قلت بكره يكون لقانا ف أرض حرة
بعد أهوال الفراق
والهنا ح يقول أنا جاى ف ميعادى
ليله تشبه الليلادى
فى بلادك وبلادى
اللى منها الشمس جايه
البلاد العربية



الليلادى
من فلسطين جت لى نسمة
فيها من ريحة زهور البرتقان
فيها طيف إنسان واحشنى من زمان
جه وزارنى وقال لى كلمة
زى أجراس الكنيسة والأدان
احنا راجعين أرضنا .. آن الأوان
والشقا ح يدوب فى بسمه
والهنا ح يقول أنا جاى ف معادى
ليله تشبه لليلادى
فى بلادك وبلادى
اللى منها الشمس جايه
البلاد العربية



الليلادى
ياما سهرنى انشغالى
على أحبابى فى لبنان والجزيرة
فى السودان وف كل أوطاننا الكبيرة
كلهم كانوا فى بالى
قلبى قسمته عليهم كلهم
علشان ينشد لهم ويقول لهم
بكره تصفالنا الليالى



والليلادى
كل أحبابى زارونى طيف خيال كحل عيونى
هام خيال كحل عيونى
هام معاهم قلبى .. سافر ودعاهم
محلا طعم السهد لما سهرونى