طالب هندسة

طول عمري بحب التعليم

أصل أنا واد في العلم قديم

كان مجموعي في الثانويه

حاجه بتاع تسعين في الميه

قلت يا هندسه يا إما بلاش

شغلانه غيرها ما تنفعناش

أول سنه كان كلي حماس

قافل علي نفسي الترباس

أحضر سكشن أسلم شيت

كنت بنام زي الكتاكيت

أول ترم عدي عليا

أتمنيت أرجع الثانويه

أخد نجمه وأغني بلادي

أخد فسحه وألعب عادي

بس يا عيني مش وقت رجوع

أنا عيني خلاص عالمجموع

أول سنه عديتها نضيف

والمجموع كان برضه ظريف

جبت يا دوب سبعين في الميه

راحت فين أيام الثانويه؟

قلت يا مدنى يا إما بلاش

قسم غيره ما ينفعناش

ومن يوميها أنا أتجنيت

ولا عمري في حاجه عديت

بكتب أسمي و أطلع تاني

تعمل إيه لو كنت مكاني؟

ميت دكتور عايزين مشاريع

وبقيت واد في العلم فظيع

قوانيني بقت بالشقلوب

حبه بحبه بقيت بلاص

بس يا ناس مرفوع الراس

أخد الصفر وأحاول تاني

أنا يائس كده ليه وبعاني

نفسي أجيب لو يوم مقبول

حد يقولي مين مسئول؟

إن إحنا في ساقيه بنتعلم

ولا راضي حد يتكلم

خلينا مشيين جنب الحيط

عاشقين أوي فن التخبيط

حاول تفهم مني كلامي

ولو ما فهمتش حعيد من تاني